Erdogan paralajmëron për pasoja katastrofike nëse vijon lufta Izrael-Iran

Në një kohë kur përshkallëzimi midis Izraelit dhe Iranit ka tronditur rajonin dhe ka ngritur shqetësime globale, Presidenti turk Erdogan ka reaguar fort, duke kërkuar ndalimin e menjëhershëm të sulmeve dhe kthimin në tryezën e negociatave.
Në deklaratat e tij publike dhe në komunikimet me liderët rajonalë dhe ndërkombëtarë, Erdoğan theksoi se një luftë e drejtpërdrejtë mes Izraelit dhe Iranit do të kishte pasoja katastrofike për të gjithë Lindjen e Mesme dhe përtej saj. ‘Një luftë shkatërruese mund të shkaktojë një valë të re refugjatësh dhe të destabilizojë plotësisht rajonin’, deklaroi ai.
Turqia ka ofruar veten si ndërmjetës për një dialog të ri diplomatik, veçanërisht në lidhje me programin bërthamor të Iranit. Erdoğan është shprehur se dialogu është e vetmja rrugë për zgjidhje dhe ka kundërshtuar çdo lëvizje ushtarake që minon paqen rajonale.
Kreu i shtetit turk nuk i kurseu as kritikat e drejtpërdrejta ndaj Izraelit, duke e cilësuar fushatën e sulmeve si ‘të pandershme dhe jashtë çdo ligji ndërkombëtar’. Në një deklaratë të drejtpërdrejtë, ai e quajti agresionin izraelit ‘banditizëm shtetëror’.
Nëse kriza përshkallëzohet, Turqia – e cila tashmë ka pritur miliona refugjatë sirianë – shpreh shqetësimin se mund të përballet me një krizë të re humanitare. Kjo është një nga arsyet pse Ankaraja po shtyn me forcë për një zgjidhje diplomatike.
Ndërkohë, komuniteti ndërkombëtar e sheh ndërhyrjen e Erdoganit si një përpjekje për të riafirmuar rolin e Turqisë si aktor i rëndësishëm në arkitekturën e sigurisë rajonale – midis Perëndimit, botës arabe dhe Iranit.
Në një kohë kur liderët perëndimorë janë të përfshirë në dilema strategjike, Turqia përpiqet të pozicionohet si zë i arsyes në një konflikt që mund të shpërthejë përtej kufijve të rajonit.